អត្ថបទទី៤ របស់លោក ចៅ ស៊ិញ មានចំណងជើងថា «ឥទ្ធិពលនៃការច្រូតស្រូវខ្ចី និងពូជខុសគ្នាទៅលើទិន្នផលនិងលក្ខណៈភាពអន្ធិលរបស់អង្ករសម្រូប (Effect of Early Harvest and Variety Difference on Grain Yield and Pasting Properties of Brown Rice)» ត្រូវបានបោះពុម្ពផ្សាយដោយទស្សនាវដ្ដី Crops MDPI ។ យើងសូមជូនសេចក្ដីសង្ខេប និងសេចក្ដីសន្និដ្ឋាន ជាភាសាខ្មែរដូចខាងក្រោម ។
សេចក្ដីសង្ខេប ៖ អង្ករបៃតងដែលប្រមូលផលមុនពេលស្រូវទុំត្រូវបានរកឃើញថា មានតម្លៃអាហារូបត្ថម្ភខ្ពស់ជាងអង្ករសម្រូបស្រូវទុំ ។ ការធ្វើពិសោធន៍រយៈពេលពីរឆ្នាំដោយដាំស្រូវក្នុងលក្ខខណ្ឌស្រូវចម្ការត្រូវបានធ្វើឡើងដើម្បីកំណត់អំពីប្រសិទ្ធភាពនៃប្រភេទពូជ ការច្រូតស្រូវខ្ចី និងអន្តរកម្មនៃកត្តាទាំងពីរនេះទៅលើទិន្នផល និងលក្ខណៈភាពអន្ធិលរបស់អង្ករសម្រូប ។ ស្រូវចំនួន ៨ ពូជ ត្រូវបានដាំនៅក្នុងលក្ខខណ្ឌទឹកគ្រប់គ្រាន់ ឬខ្វះខាតទឹក និងប្រមូលផលក្នុងចន្លោះ ១៥ ទៅ ៣៥ ថ្ងៃបន្ទាប់ពីចេញផ្កា ។ ទិន្នផលអង្ករបៃតងអតិបរមាអាចទទួលបាននៅពេលច្រូតកាត់ក្នុងចន្លោះ ២០ ទៅ ២៥ ថ្ងៃបន្ទាប់ពីចេញផ្កាក្នុងលក្ខខណ្ឌទឹកគ្រប់គ្រាន់ និងពីចន្លោះ ១៥ ទៅ ២០ ថ្ងៃបន្ទាប់ពីចេញផ្កាក្នុងលក្ខខណ្ឌខ្វះខាតទឹក ។ ទិន្នផលស្រូវពេលប្រមូលផលក្នុងពេលវេលាទាំងនេះជាមធ្យមទទួលបាន ៦៦% នៃទិន្នផលស្រូវទុំ ។ ប្រភេទពូជមានសង្គតភាពទិន្នផលពេលប្រមូលផលចន្លោះ ២០ ទៅ ២៥ ថ្ងៃបន្ទាប់ពីចេញផ្កា ដោយមានមេគុណទំនាក់ទំនង ០,៨៩៧** រវាងឆ្នាំដាំដុះទីមួយនិងទីពីរ ។ ការវិភាគលក្ខណៈភាពអន្ធិលរហ័ស (RVA) បង្ហាញថា អង្ករស្រូវខ្ចីមានភាពអន្ធិលទាបជាងអង្ករស្រូវទុំ ។ ប៉ុន្តែវិបរិណាមពូជមានឥទ្ធិលលើលក្ខណៈភាពអន្ធិលខ្លាំងជាងពេលវេលាច្រូតកាត់ ។ ប្រភេទពូជមានសង្គតភាពលក្ខណៈភាពអន្ធិលរវាងអង្ករស្រូវខ្ចី និងអង្ករស្រូវទុំ និងរវាងឆ្នាំដាំដុះ ។ ការដាំដុះក្នុងលក្ខខណ្ឌខ្វះខាតទឹកកាត់បន្ថយទិន្នផលស្រូវ ប៉ុន្តែមិនមានឥទ្ធិលគួរកត់សម្គាល់ទៅលើលក្ខណៈភាពអន្ធិលនៃម្សៅ បរិមាណអាម៉េឡូស និងប្រូតេអ៊ីនទេ ។ លទ្ធផល RVA បង្ហាញថា ភាពអន្ធិលចុងក្រោយ និងភាពអន្ធិលបន្ទាប់ពីសីតុណ្ហភាពចុះត្រជាក់របស់ម្សៅអង្ករសម្រូបច្រូតនៅ ១៥ ថ្ងៃបន្ទាប់ពីចេញផ្កា គឺមានត្រឹមតែ ៨៤% និង ៧៦% នៃភាពអន្ធិលរបស់អង្ករស្រូវទុំប៉ុណ្ណោះ ជាសញ្ញាបង្ហាញថា អង្ករស្រូវខ្ចីអាចនឹងដាំជាបាយទន់ជាងអង្ករស្រូវទុំ ។ លទ្ធផលបង្ហាញពីការប្រែប្រួលខុសគ្នា (វិបរិណាម) នៃលក្ខណៈភាពអន្ធិលរវាងអង្ករស្រូវខ្ចី និងអង្ករស្រូវទុំ ផ្ដល់នូវជម្រើសថ្មីៗបន្ថែមទៀតក្នុងការកែច្នៃចំណីអាហារតាមលក្ខណៈភាពអន្ធិលដែលចង់បាន ៕
សេចក្ដីសន្និដ្ឋាន ៖ ការសិក្សានេះបានបង្ហាញឲ្យឃើញពីប្រសិទ្ធភាពនៃការប្រមូលផលស្រូវខ្ចីលើទិន្នផល លក្ខណៈភាពអន្ធិល និងសារធាតុគីមី ។ ទិន្នផលអង្ករបៃតងអតិបរមាទទួលបាននៅពេលច្រូតស្រូវក្នុងចន្លោះ ២០ ទៅ ២៥ ថ្ងៃបន្ទាប់ពីចេញផ្កាក្នុងលក្ខខណ្ឌទឹកគ្រប់គ្រាន់ និងពីចន្លោះ ១៥ ទៅ ២០ ថ្ងៃបន្ទាប់ពីចេញផ្កាក្នុងលក្ខខណ្ឌខ្វះខាតទឹក ។ អង្ករស្រូវខ្ចីមានភាពអន្ធិលទាបជាងអង្ករស្រូវទុំ ជាសញ្ញាប្រាប់ថា បាយអង្ករស្រូវខ្ចីទន់ជាងបាយអង្ករស្រូវទុំ ។ លក្ខណៈភាពអន្ធិលនៃពូជខុសគ្នាគឺមានវិបរិណាមធំ និងមានសង្គតភាពរវាងឆ្នាំដាំដុះទាំងពីរ ។ ប្រៀបធៀបនឹងលក្ខខណ្ឌទឹកគ្រប់គ្រាន់ ការដាំដុះដោយខ្វះខាតទឹកកាត់បន្ថយទិន្នផល ប៉ុន្តែគ្មានភាពខុសគ្នាចំពោះបរិមាណអាមីឡូស ប្រូតេអ៊ីន និងលក្ខណៈភាពអន្ធិលរបស់អង្ករសម្រូប រវាងលក្ខខណ្ឌដាំដុះទាំងពីរទេ ។ គំហើញពីការប្រែប្រួលខុសគ្នា (វិបរិណាម) នៃលក្ខណៈភាពអន្ធិលរវាងអង្ករស្រូវខ្ចី និងអង្ករស្រូវទុំ ផ្ដល់នូវជម្រើសថ្មីៗបន្ថែមទៀតក្នុងការអភិវឌ្ឍចំណីអាហារតាមលក្ខណៈភាពអន្ធិលដែលចង់បាន ៕
សមាគមនិសិ្សតខ្មែរប្រចាំរដ្ឋឃ្វីនស្លែន 